(ကြေးမုံသတင်းစာ၊ ဖေဖော်ဝါရီ ၁၇၊ ၂၀၂၃)
ဒေါက်တာနိုင်ဆွေဦး
ဝါရင့်အကြံပေး၊ မြန်မာနိုင်ငံ မဟာဗျူဟာနှင့် နိုင်ငံတကာလေ့လာရေးအဖွဲ့
ဒီနေ့ ကျင်းပတဲ့ ဖိုရမ်ကတော့ မြန်မာ-ရုရှား (၇၅) နှစ်မြောက် သံတမန်ဆက်သွယ် ထူထောင်မှု အထိမ်းအမှတ် မြန်မာ-ရုရှား ချစ်ကြည်ရေးနှင့် ပူးပေါင်းဆောင်ရွက်ရေးဖိုရမ် ဖြစ်ပါတယ်။ ဒီဖိုရမ်မှာ မနက်ပိုင်းအစီအစဉ်ဖြစ်တဲ့ ပူးပေါင်းဆောင်ရွက်မှုဆိုင်ရာ ဖိုရမ် အပိုင်း (၁) မှာ ပါဝင်ဆွေးနွေးတာ ဖြစ်ပါတယ်။
ကျွန်တော်ဆွေးနွေးတဲ့ အကြောင်းအရင်းကတော့ နှစ်နိုင်ငံကာကွယ်ရေးနဲ့ လုံခြုံရေးဆိုင်ရာ ပူးပေါင်းဆောင်ရွက်မှုဆိုင်ရာ ကိစ္စတွေကို ဆွေးနွေးခဲ့တာ ဖြစ်ပါတယ်။ လွန်ခဲ့တဲ့ဆယ်စုနှစ်စုကျော် သုံးစုနီးပါး နှစ်နိုင်ငံ စစ်ဘက်ဆိုင်ရာ ပူးပေါင်းဆောင်ရွက်မှုတွေ တိုးတက်လာတယ်။ နိုင်ငံတော်စီမံအုပ်ချုပ်ရေး ကောင်စီ ဥက္ကဋ္ဌ နိုင်ငံတော်ဝန်ကြီးချုပ်ရဲ့ လက်ထက်မှာ ပိုပြီးတော့ တိုးတက်လာတယ်ဆိုတဲ့အကြောင်း ဆွေးနွေးခဲ့တာ ရှိပါတယ်။ ရုရှားနိုင်ငံကို ကျွန်တော်ကိုယ်တိုင် ပညာတော်သင်သွားရောက်ခဲ့တဲ့ အခြေအနေတွေ ရုရှားတက္ကသိုလ်တွေကနေ မြန်မာ့တပ်မတော် အရာရှိတွေ၊ သိပ္ပံနှင့် နည်းပညာနဲ့ ပညာရေးဝန်ကြီးဌာနက ဆရာတွေ အပါအဝင် ဘွဲ့ရရှိခဲ့သူပေါင်း ၇၀၀၀ ကျော် ရှိခဲ့ပြီဆိုတဲ့ အကြောင်းအရာတွေလည်း ပါပါတယ်။ စစ်ဘက်နည်းပညာပူးပေါင်းဆောင်ရွက်ရေး ကော်မရှင်နဲ့ ပတ်သက်ပြီး ထည့်သွင်းစဉ်းစားခဲ့တဲ့အပိုင်းလည်း ရှိပါတယ်။
ကျွန်တော်တို့ မြန်မာနိုင်ငံ လွတ်လပ်ရေး ရရှိခဲ့တဲ့ ၁၉၄၈ ခုနှစ် ဇန်နဝါရီ ၄ ရက်အပြီး သိပ်မကြာခင်ဖြစ်တဲ့ ဇန်နဝါရီ ၁၈ ရက်မှာ ရုရှားနိုင်ငံနဲ့ သံတမန်ဆက်ဆံရေး စတင်တည်ထောင်တာ ဖြစ်ပါတယ်။ ချစ်ကြည်ရင်းနှီးစွာ ဆက်ဆံခဲ့တဲ့ (၇၅) နှစ် ပြည့်မြောက်ခဲ့ပြီဖြစ်ပြီး အထူးသဖြင့် ကာကွယ်ရေးနှင့် လုံခြုံရေးဆိုင်ရာ စစ်ဘက်ပူးပေါင်းဆောင်ရွက်မှုမှာ ပိုမိုတိုးတက်လာတာ တွေ့ရပါတယ်။
လက်ရှိ အခြေအနေမှာကတော့ ဒီကဏ္ဍတွေတင်မကဘဲ နျူကလီးယားဆိုင်ရာကိစ္စတွေ၊ လျှပ်စစ်ဆိုင်ရာကိစ္စတွေ၊ တခြားကဏ္ဍစုံတွေမှာလည်း ဖွံ့ဖြိုးတိုးတက်လာတာ တွေ့ရမှာ ဖြစ်ပါတယ်။ ဒီဖိုရမ်ကျင်းပခြင်းဟာ နှစ်နိုင်ငံဆက်ဆံရေး ပိုမိုဖွံ့ဖြိုးတိုးတက်စေမှာ ဖြစ်ပါတယ်။ နှစ်နိုင်ငံ ဆက်လက်ပူးပေါင်းဆောင်ရွက်ရမယ့် အခွင့်အလမ်းတွေ မြင်လာမှာ ဖြစ်တယ်လို့ ကျွန်တော် ဒီလိုပဲ ယူဆပါတယ်။
ဒီလိုမျိုးပွဲတွေ ကျင်းပတာဟာ ကျွန်တော်တို့ နှစ်နိုင်ငံဆက်ဆံရေး တိုးတက်စေရုံသာမကဘဲ ပြည်သူတွေ အချင်းချင်းမှာလည်း နှစ်နိုင်ငံ အပြန်အလှန်သဘောထားတွေ၊ ဆက်ဆံမှုတွေ၊ အထူးသဖြင့် ကုလသမဂ္ဂ စင်မြင့်ပေါ်မှာ ကျွန်တော်တို့နိုင်ငံကို ရုရှားနိုင်ငံအနေနဲ့ ကူညီဆောင်ရွက်ပေးခဲ့တာတွေ ပိုပြီးတော့ နားလည်သဘောပေါက်လာမယ်။
ဒါ့အပြင် နှစ်နိုင်ငံ အပြန်အလှန်အခွင့်အလမ်းတွေဖြစ်တဲ့ စီးပွားရေး၊ ပညာရေး အပါအဝင် အခြားသော အခွင့်အလမ်းတွေ ဘာတွေရှိလာမလဲဆိုတာ တွေ့လာမှာဖြစ်ပါတယ်။ နှစ်နိုင်ငံဆက်ဆံရေးဟာ ရေမြေမိုင်ပေါင်း ၄၀၀၀ ကျော်ကွာဝေးတယ် ဆိုပေမယ့် မဟာဗျူဟာမိတ်ဖက်အနေနဲ့ ဆက်ပြီး ဆက်ဆံရေးတိုးတက် ခိုင်မာလိမ့်မယ်လို့ ကျွန်တော့်အနေနဲ့ သုံးသပ်မိပါတယ်။
ဒေါက်တာနိုင်ဆွေဦး
သေနင်္ဂမဟာဗျူဟာလေ့လာရေးအဖွဲ့
