အိန္ဒိယသည် ပြည်တွင်းထုတ် သင်္ဘောဖျက်ဒုံးကျည်အား  ပထမဆုံးအကြိမ် စမ်းသပ်မှု ပြုလုပ်နိုင်ခဲ့ခြင်း

အိန္ဒိယသည် ပြည်တွင်းထုတ် သင်္ဘောဖျက်ဒုံးကျည်အား  ပထမဆုံးအကြိမ် စမ်းသပ်မှု ပြုလုပ်နိုင်ခဲ့ခြင်း

အိန္ဒိယရေတပ်၏ ကာကွယ်ရေးသုတေသနနှင့် ဖွံ့ဖြိုးတိုးတက်ရေးအဖွဲ့ (DRDO) တို့သည် ရေတပ်သင်္ဘောဖျက် ဒုံးကျည်၏ ပထမဆုံးသော စမ်းသပ်ပျံသန်းမှုကို အောင်မြင်စွာ ပြုလုပ်နိုင်ခဲ့သည်။ အဆိုပါဒုံးကျည်သည် အိန္ဒိယရေတပ်၏ ပထမဆုံးပြည်တွင်းထုတ် လေကြောင်းမှ ပစ်လွှတ်နိုင်သည့် သင်္ဘောဖျက်ဒုံးကျည်စနစ်လည်း ဖြစ်သည်။

အိန္ဒိယနိုင်ငံ၊ Odisha ကမ်းလွန်ရှိ Chandipur ရှိ ပေါင်းစပ်စမ်းသပ်ရေးစက်ပစ်ကွင်း (ITR) တွင် မေလ ၁၈ ရက်က စမ်းသပ်ပျံသန်းမှု ပြုလုပ်ခဲ့ပါသည်။ အိန္ဒိယရေတပ်နှင့် DRDO မှ အကြီးတန်းအရာရှိများက တက်ရောက်ကြည့်ရှု ခဲ့ကြသည်။ စမ်းသပ်မှုအတွင်း အိန္ဒိယရေတပ် ရဟတ်ယာဉ်မှ သင်္ဘောဖျက်ဒုံးကျည်တစ်စင်းကို ပစ်လွှတ်ခဲ့ပါသည်။ ၎င်းသည် သတ်မှတ်ထားသော ပစ်မှတ်ကို ထိမှန်ဖျက်ဆီးရန် ပင်လယ်ရေလမ်းကြောင်းအတိုင်း ထိန်းကျောင်း ပျံသန်းနိုင်ခဲ့ပါသည်။

အိန္ဒိယရေတပ်၏ အဆိုအရ သတ်မှတ်ထားသော ရည်မှန်းချက်များ အားလုံးကို တိကျသေချာစွာ ဖြည့်ဆည်း ပေးနိုင်ခဲ့သည်ဟု သိရှိရသည်။ ထို့အပြင် ဒုံးကျည်တွင်ပါဝင်သည့် စနစ်အစိတ်အပိုင်းများ၏ စွမ်းဆောင်ရည်မှာ ကျေနပ်စရာဖြစ်သည်ဟုဆိုပါသည်။ အိန္ဒိယကာကွယ်ရေးဝန်ကြီး Rajnath Singh က “အိန္ဒိယဟာ ပြည်တွင်းထုတ် ဒီဇိုင်းနဲ့ ဒုံးကျည်စနစ်တွေ ဖွံ့ဖြိုးတိုးတက်မှုမှာ စွမ်းရည်မြင့်မားတဲ့ အဆင့်ကို ရောက်ရှိခဲ့ပါတယ်” ဟု ပြောကြားခဲ့သည်။

အဆိုပါစမ်းသပ်မှုတွင် လမ်းညွှန်မှု၊ ထိန်းချုပ်မှုနှင့် တိကျမှုအပါအဝင် သင်္ဘောဖျက်ဒုံးကျည်များ၏ စွမ်းဆောင်ရည် အမျိုးမျိုးကို ရည်မှန်းချက် တာဝန်ထမ်းဆောင်မှုများအလိုက် အဆင်ပြေချောမွေ့စွာ ပြုလုပ်နိုင်ခဲ့ကြပါသည်။ ဒုံးကျည်ပစ်လွှတ်စဉ်အတွင်း အဖြစ်အပျက်အားလုံးကို ဒုံးပျံသန်းရာလမ်းကြောင်းကို ခြေရာခံထိန်းကျောင်းခြင်း အပါအဝင်၊ စမ်းသပ်စက်ပစ်ကွင်းနှင့် ထိမှန်ဖျက်ဆီးနိုင်မှု စသည်တို့တွင် အာရုံခံကိရိယာများကို အသုံးပြု၍ မှတ်တမ်းတင်နိုင်ခဲ့ပါသည်။

DRDO ဥက္ကဋ္ဌ Dr G Satheesh Reddy မှလည်း မစ်ရှင်အောင်မြင်မှုအတွက် ရေတပ်လေကြောင်းစမ်းသပ်ရေးတပ်စု၊ အိန္ဒိယရေတပ်နှင့် ဆက်စပ်အဖွဲ့များ၏ ကြိုးပမ်းအားထုတ်မှုများကို ချီးကျူးဂုဏ်ပြုခဲ့ပါသည်။ သင်္ဘောဖျက်ဒုံးကျည်တွင် ရဟတ်ယာဉ်အတွက် ပြည်တွင်းထုတ် ဒုံးပစ်လောင်ချာကဲ့သို့သော နောက်ဆုံးပေါ်နည်းပညာမျိုးစုံကို ထည့်သွင်းအသုံးပြုထားပါသည်။ ထို့အပြင် ဒုံးကျည်တွင် လမ်းညွှန်စနစ်တွင် avionics နှင့် navigation တို့ကို ပေါင်းစည်းအသုံးပြုထားခြင်းဖြစ်ပါသည်။

India conducts maiden flight test of indigenous naval anti-ship missile အား ဘာသာပြန်ဆိုထားပါသည်။

သက်ထူးခန့်ပိုင်(ရေနံချောင်း)

သေနင်္ဂမဟာဗျူဟာလေ့လာရေးအဖွဲ့